#الطريق_الى_كندا 3
وصلت لكندا ليس معناها وصلت فحياتي
صعوبات لي كاينا هنا كتر من لي كاينا فالمغريب
تمارا لي كاندير هنا كتر من لي درت فلمغريب
ولكن الشيء الجميل هنا هو تا واحد ما يحگرك بعينيه الى شافك تادير لميناج ولا تتجمع زبل
عقلتو فاش قلتليكوم بلي لقراية كانت قربات و انا مزال ما عيطولي للڤيزة؟!
الحمدالله ربي كايدير طريق! حيتاش فاش شديت لڤيزا و خاصني نجي كان خاصني شوية ديال لفلوس دفعت للجامعة تأجيل ديال دورة مع العلم كانو عاد بداو بأسبوع علاش؟ هاااا علاش حيتاش القانون الكندي متايسمح لطلبة الغير كندين باش يخدمو كتر من 20 ساعة فالأسبوع إلى كانو تايقراو
و انا محتاج نخدم باش نجمع فلوس لقراية ( لقراية هنا بالفلوس و غالية وبالخصوص اذا فكرتي بدرهم حيتاش الطالب الغير كندي تيخلص خمس مراة أغلى من طالب الكندي )
جيت و وصلة بسلامة
ساليت الجهاد الأصغر و بديت الجهاد الأكبر تانقلب على خدمة فاش ما عطا الله، واحد سيد قالي واش نتا عندك ماستر و بغيتي تخدم فمحال ديال لبيع و شرى، اودي عطيني غا لفلوس هاد ساعة و نبقا نبدل لخروق لدراري صغار، للمعلومة فقط لي فيه عزة النفس و مايرضاش يخدم فاش ما عطا الله غير يبقى فلمغرب و للمعلومة ايضاً هنايا أي خدمة خدمتيها غاتعيش معزز مكرم،
بديت لخدما فداك لمحل ديال لبيع و شرى داير فحال بيم bim لي فالمغرب، ( كنت خدمت فبيم واحد لوقت ووقعات واحد لحادت عمري نساها كنت عاد شديت لإجازة موهيم كنت تانشطب لمحال و دخلات واحد سيدة هيا و ولدها صغير و شافوني تنشطب و قالت لولدها ها علاش تا نقوليك قرى، باش فاش تكبر متخدمش هاد لخدامي ، شكراً لكي سيدتي من هاد المنبر و نتمنى يكون ولدك تايقرى مزيان و شكراً حيتاش رديتيني قنطرة عبور )
ما علينا فاش بديت لخدمة كنت فلول كنت كنبدل لميكات ديال زبل و نستف سلعة و نمسح زاج و فنفس الوقت كنت تنتعلم نشد لاكيس خدمة مع هاد سيد يهودي سوري جا قديم هنايا و كان تعاون معايا بزاف فلول حيتاش جبرني خدام بنيتي.
لمشكل من بعد شهر بدا يطيح تلج و ضربتها بواحد تكربيعا ديال لعجل فاش كيتدبح ، تفدعة من يدي و اضطررت نخسر داكشي لي جمعت على يدي. وبديت من الاول مهم تمكنت باش نخلص دورة لي قريت فلجامعة حيتاش جبت معايا شي باراكا من المغرب ولكن كانت ماكافياش حتى لدورة وحدة
صافي فاش بدات لقرايا دبرت خدما ديال ليل فحال أغلب الطلبة و قراية فصباح و نعاس فلعشية مهم دابا درت بلان أخور من غير لجامعة حيتاش غالية لبلان هو درت وحد المؤسسة رخيصة و فالمستطاع ديالي نخلصها و بزربا نشاء الله ندبر فخدما بيها
قصة حقيقية ديال
حتى واحد ما ملزم عليه يتيق
و إنشاء الله لي بغا شي حاجة غادي يوصل ليها
لي عندو أي سؤال على راس و العين يسول فالخاص
راني بديت كانجاوب شوية ب شوية
شكراً لتشجيعكم و شكراً لكلامكم الطيب
المرجو الدعاء برحمة لصديقي و أخي الذي لم تلده امي علي العبادي لوله لما كنت على ما أنا عليه و هو الذي سبق وذكرته فالجزء الأول (مازال ما درت تا حاجة مستحيلة فحياتي ولكن لوله لما تمكنت من التغلب على نفسي
ليست هناك تعليقات:
إرسال تعليق