الطريق الى كندا ج2

 
 #الطريق_الى_كندا 2 

قبل من بدا الجزء الثاني بغيت نقوليكوم اي واحد قادر يوصل رضى الله و وضى الولدين و الإرادة و المثابرة اي واحد يقدر يوصل.
فاش دفعت للجامعة الأخيرة كان خاصني نخلص تقريباً 800 درهم و كنت زاوي دربني نضور، كنت فالحي الجامعي مولاي اسماعيل كنهضر مع صاحبي علاء كان تايوريني تيليفون عاد شراه جديد ب 1300 درهم عاقل عليه سامسونغ j3 گالس تايهضرلي على الفلاش فلقدام و المميزات، و انا مرفووووع ربي لي حاس بيا جات لفرصة ايدي ولكن فلوس والو! قالي مالك ا امين مولفك ضاحك و دابا بنتيليا فشكل قولتليه ها شنو كاين و ها شنو كاين قالي غادي يفرج الله و اي فيها لخير غدا تكون. كانت شي سبعة ديال لعشية قالي انا انخرج نمشي نشري لخضرة و داكشي باش تصرعلينا شي طاجين و خرج.
سيد خرج دازت نصف ساعة ساعة ساعة و نص و عاد جاي تيجر فصندالتو! وا با علاء راه 9h هادي راه غنوجدو صحور دابا. بقا يضحك و جبد 800 درهم عطاهالي قالي هاك أ خاي أمين الله يسهل عليك. والله أ خوتي إلى دموع سالوليا داك ساعة و حتى دابا هاهوم تيسيلو و واحد شينوية گالسة حدايا فالباص ما فاهما والو حسابليها تنكتب رسلة قبل الإنتحار. 
ما علينا. قلتليه منين جبتي لفلوس قالي راه كنت مخبيهوم من المنحة لي دازت 
قلتليه يهديك الله أ علاء نتا معندكش لمنحة بقا يضحك قالي راه مشيت بعت تيليفون و هدا ما جابلي والله 
ما كرهتش نبوسليه رجلو داك ساعة وقف معايا فواحد لوقت حساس من حياتي. خلصت من بعد يوماين من بعد سير و أجي و تعقيدات ديال مكتب صرف و إرسال العملة الصعبة ( هي كانت صعبة حيتاش ما كانتش عندي غير صاحبي لي وقف معايا) 
و كنت داك ساعة مرون مع الأطروحة ديالي راسي هنا و راسي لهيه. دوزت soutenance الحمد الله دازت مزيانة و جاء وقت دفيع للفيزة 2200dh باش كاتقام و امين كعادته (انقدو هته الطفولة) الأزمة الإقتصادية دربات اليونان و فرانسا و سبانيا و امين.
عيطت لواليدة قلتليها ها شنو كاين واش كاين شي مساعدة قالتلي صبر عليا 3 ديال سوايع. بالفعل من بعد 3 ديال سوايع سيفطاتلي 2500 درهم فويسترن يونين مشيت دفعت وحق الله أ خوتي إلى نهار اخر أجل. صافي بديت بديت غنكمل ولي بغاها الله هي لي تكون.
شي يوماين من بعد هضرت مع خويا كان فتاونات و قالي لواليدة خلصات شي تخربيق فلول ديال شهر و بقات زاوية 
قلتليه راها عاد سيفطاتلي شي فلوس ولبارح 
قالي هادوك فلوس أخر دمليج بقى عندها باعتو ( الصدمة كانت قوية)
صافي دفعت لوريقات و بقيت كنتسنى يجاوبوني دازت شي شهر و مازال ما كاين والو انا قلت صافي ماكتابش. واحد دري صاحبي قالي غانمشيو لمارتيل مع دراري صحابنا كاينا دار جيب معاك غير مصروفك و يالله تفوج راك وليتي صفر من زعفران.
مشينا لمارتيل و كنا واقيلا حدا شي مطار 
مهم طيارات كانو كتر من ناموس 
وحق الله إلى كل ما تادوز شي طيارة تانبقا ندعي يا ربي لما سهل عليا فيها و درت صلاة الإستخارة ما خلية ما درت 
دازت شي 2 اسبيع و عيطولي أجي دوز الفحص الطبي
الله و أكبر هي القضية مازالا مطولة و صافي،
مشيت دوزتو فرباط و قالتلي طبيبة نهار يعيطوليك دوز الفحص الطبي يعني انشاء الله غاتمشي. 
صافي رجعت لدار و حنى ف اواخر شهر غشت و لقراية غاتبدى فلول ديال شتنبر فكندا صافي ضاع الأمل.
نهار 27 غشت كنت خارج و خليت تيليفون فدار وجعت جبرت شي نمرة غريبة معيطا ليا و مخليالي رسالة صوتية
مفادها اجي غدا تاخود الملف ديالك من مكتب تقديم لڤيزا.
مشيت و جبرت تماك شي ولاد تايهضرو، و باينا من الطبقة الغنية اللهم بارك. دخل لول عطاوه لملف 
رفضوه دخل تاني تا هو رفضوه دخل تالت كذالك جات نوبتي ( قلبي رجع تايضرب المراسلوي مع العيطة مع الأوبرا) حليت لملف و عطيتو لواحد لموضفة تماك قلتليا شوفي أ ختي عافاك راه ركابي فشلو
قرات و قالتلي والو و بزربا قالتلي تانضحك معاك مبروك عليك ( اويلي على كانضحك معاك ما ضحكيش معايا بغيليك سريسرة بقات ضحك) 
الله الڤيزا قلتليها واش دابا خاصني نحط فلوس فالبنك ولا شن خاص ندير( و انا والله اما عندي عشا ليلة ) قالتلي مادام ما قالوليك والو صافي ما غتحط والو 
عاافك اختي ما تقوليليش عاوتاني تضحكي معايا، قالتلي لا والله الا بصح ما غاتحط والو 
درت كلشي بيدي انا دفعت و انا لي كنت تانجري ما كاين لا محامي والا مكتب الهجرة 
مزال الجزء الثالث حيتاش تيليفون غايطفالي دابا
و مازال غنشرح ليكوم كولشي والله تانقوليكوم بتفصيل 
كونو مكافحين و تقاتلو 
انا جيت لكندا اه ولكن فحال هداك لي عاد شد لباك 
يا إما يزير راسو يا إما هزو لما 
لنا عودة بعد قليل

Jonathan Vidic