السلام عليكم
كان لحلم ديالي هو نحقق لحلم ديالي (اش هاد تخربيق؟!) بصح كنت تانحلم نحقق بعض الأحلام فحياتي.
عاودت الباك حيتاش كنت منقدرش نهز كتاب و نراجع ، معگاز من درجة فارس ، نعاس كنعطيه 10ل 0 سهل الله سنة لي من بعد و نجحة فالباك 2008/2009 بمعجزة إلاهية و نقيل و رغيب و المزارگاة مهم جبت الباك،
جا الوقت باش نقرر كسار حياتي ( اشمن مسار يااا هاد نقال)
يالله ماشي مسار حياتي بغيت نمشي ندير لافاك ولكن فمدينة من غير فاس ( حيتاش انا ولد مدينة تاونات و ما عندناش لجامعة و اقرب وحدة هي فاس) صافي رغبنا انا و الأسرة ديالي واحد البرلماني ولد لبلاد هو لي جابلي الإنتقال الى الرباط.
وصلت لرباط و سكنت انا و صاحبي (ع) و ختارينا شعبة الإقتصاد ( مثل كل المغاربة لي حفاتليه فحياتو يدير لافاك و لي حفاتليه فلافاك يدير اقتصاد) اويلي على الاقتصاد، دخلت نهار لول جاني داكشي بالفرنسية و صعيب و انا كنت علمي (غير بسمية) دخلت النهار الأول نهار تاني .. دربت سيمانة حلفت لا رجعة للافاك. إذاً قررت ان تكون السنة الأولة هي سنة الإكتشاف، داز لعام بزربة و مشيت دوزت صيف و وجعت لرباط من اجل السنة الدراسية
دخلت نهار لول ما فهمت والو عاوتاني، دخلت لبيت فالعشيا و قلت مع راسي يا إما انا مكلخ يا إما انا مكلخ و ف الحلتين راها ما مسلكاش
واليديا هما لي كيصرفو عليا باش نقرى و انا إبن أسرة متوسطة مكونت من أربع أفراد اب أستاد متقاعد مد و أم مكافحة كتقاتل مع زمان باش ولادها يوصلو
الأم ديالي لم تكل و لم تمل من المساعدة ديالي
و ديال الأخ الأصغر.
معلينا رجعت لدار و بقيت تنفكر ( عام مشا فالباك و عام مشا فلا فاك و لعمر كيزيد و ضحك و النشاط ما ديمش) المشكل كان عندي تأنيب الظمير ولكن من دون المرور إلى التطبيق.
صاحبي ع كان إنسان رائع كان تايقرى حسن مني و كان ديما تاينصحني نقرى على راسي، كان فاقد فيا الأمل و وخا هكاك كان ديما كينصحني باش نقرا على راسي
كانو كيتعاونو عليا هو و الظمير ديالي.
ع صاحبي توحشتو بزاف حيتاش فنفس السنة ربي بغاه و توفى بدون أي سابق إنذار توفى بسكة قلبية أقسم بالله إلى انا كانكتبها دابا و الحزن خارج من اعماق قلبي و فنفس الوقت ما مصدقش راسي.
هادي كانت هي النقطة لي قلبات حياتي سفاها على علاها. شفت بلي دنيا ما ساويا والو إوا على الأقل ندير شي حاجة فحياتي.
بديت تانمشي نحضر لدروس و ما كانفهمش ولكن منين ندخل بليل ونتاقتل و نشد النجد عربي فرنسي باش نفهم اش كاين فداك درس. كنت تانشوف دراري كيتجاوبو مع الأستاد و انا يلاه باغي نفهم غي علاش تيهضرو.
جا لمتحان أقسم بالله إلى جيت فلكلاسمون حسن من لي كانو كيتجاوبو مع الأستاد و لي ساعدني على هدشي هو ان اغلب المواد كانت ديال لحساب ما فيهاش لكتابا و تعبير. هذا كان حافز و وليت من بعد تانقرى كتوبا و نتفرج ف أفلام بلفرنسية و المستوى ديالي تحسن الحمدلله
المهم شديت الإجازة و جاء وقت الحسم الماستر،
دوزت صيف كامل تنقرى بوحدي صهد و لحرارة و ما عندناش كليماتيزور و انا كانكل الحرف. ناس بداو تايدفعو للمستر فمختلف المدن، انا كان لحلم ديالي ندير ماستر ف comptabilité, contrôle et audit ناس لي دايرين اقتصاد غادي يفهمو بلي هذا هو احسن ماستر كاين
دوزنا ب 4500 و تقبلت مع 50 واحد ااااه تقبلت فالماستر لي كنت تنحلم بيه.
بديت لقراية و ما نكرش بلي كانت لقراية مزيرا المهم حمد لله دازت مزيانة ولكن كنت كنطلاقا مع الخريجين ديال المستر كايقولولي بلي سوق الشغل عامر ، غادي تخدم ولكن خسك تبدا بلي عطا الله و فاش تكون عندك الخبرة غادي تخدم بلي بغيتي.
متقبلتش الفكرة حيتاش طموح ديالي كتر من هاكا. جات الفكرة ديال كندا
كنت فسنة الأولى ماستر فاش بديت نجمع المعلومات و لي هضرت معاه تيقولي خاصك 40 مليون 38 مليون 50 مليون 18مليون فالعام
ولكن وليديا معندهومش الإمكانيات باش يخلصو عليا و منين غادي نجيبو لفلوس لي غادي نحطو فلكونت فالبنك؟
لعام تلني قلت غادي ندفع و لي ليها ليها ما تعرف ربي اشنو مكتبليك
دفعت فشهر يناير و جاوبوني بلي ما تقبلتش دفعت فجامعة وحداخرى ففبراير ما تقبلتش صافي خرجنا سطاج ديال fin d'étude و جبدنا لهضرة انا و واحد صديقة فهاد لموضوع و قلتليها راني دفعت و والو قالتي اش غاتخسر الى دفعتي عاوتاني جرب دفع لمستوى اقل ولى شي جامعة صغيرة.
ابريل دفعت لجامعة فمقاطعة الكيبك و انا دابا فكندا
وتقدر تنفعكوم الى بغيتو تجيو لهنا
و فنهاية
Il n'y a aucun secret pour réussir, c'est le résultat de la préparation, le travail acharné et apprendre de l'échec
By @Jonathan Vidic
ليست هناك تعليقات:
إرسال تعليق