قوانين "مورفي" ديال سوء الحظ..
أول مرة ظهر قانون "مورفي"..لي هو القانون الأساسي لي تبنات عليه هاد القوانين..ظهر ف قاعدة إدوارد الجوية..ف أمريكا عام 1949..وتسمى بقانوم مورفي نسبة للكابتن "إدوارد مورفي" لي كان مهندس ف مشروع على قياس مدى تحمل الجسم البشري للتباطئ المفاجئ ف السرعة..
وكان واحد من المكلفين بالمشروع دار واحد الغلطة ف التوصيلات الكهربائية..دورها فيه مورفي وقاليه..إيلا كان احتمال حدوث خطأ ولو صغير فهو لي غيحدث..
وكام كيقصد أنه يزير عليه باش ياخذ الاحتياطات ديال السلامة..
سمعو المسؤول الكبير على المشروع..ومن تما تحولات ديك العِبارة ل "قانون مورفي" بين عاملي المشروع ..ومن بعد ف العالم كامل...
********************************
غنعطيكم أمثلة..ماشي حصرية..على قانون مورفي..أمثلة كنعيشوها ف حياتنا اليومية..
1-كل حاجة كتعطل ف نفس الوقت
2-أي سلك قطعتيه حسب طول معين هو أقصر من لي باغي..
3-طرف الخبز ديما كيطيح على الجهة لي فيها الزبدة..أو المربى
4-أي حاجة درتيها كتستغرق أكثر من الوقت لي كنتي متوقعو..كيفما درتي
5-قانون الذاكرة..فرصة نسيانك لشي حاجة مهمة كتناسب طرديا معا الأهمية ديالو
6-كل حل كيخلق مشاكل جديدة
7-الحاجة لي كتطيح من يديك كتطيح ف البلاصة لي غتسبب ليها أكبر ضرر ممكن
8-كتكون كتقلب على شي حاجة وماكاتلقاهاش وكتشري بديل ليها...شوية وكتلقى الحاجة لي كنتي تقلب عليها
9-بمجرد تشري ديك السلعة النادرة..غتلقاها موجودة وكاينة وكولشي عندو وبثمن ناقص على لي شريتي بيه
10-أي حاجة ممتعة ف الحياة..يا إما غير قانونية أو غير أخلاقية أو كتسبب السمنة
11- كل حاجة كتطيح ف الطواليط..كتطيح مباشرة ف القرقارة سواء رومية ولا بلدية
12-أي حاجة خبيتيها ف مكان أمين..ماكاتلقاهاش
13-الأفكار العظيمة ماكاتفكرهاش..والأفكار الغبية ماكاتنساهاش
14-الرجل لي سابقك مباشرة ف النوبة ف شي إدارة كيكون عندو مشكل كيتطلب وقت كثير
15-المسار الثاني ديال الطوموبيلات كيتحرك ديما سرع من المسار لي نتا فيه
16-إيلا كنتي واقف ف صف طويل كتسنى النوبة وكان كيتحرك ثقيل..غير تبدلو يولي يتحرك بالزربة
17-عمرك تبين لشي آلة ميكانيكية خدام بيها أنك مزروب..ديك الساعة غتخدم ثقيلة..
18-يتزاحم الأغبياء على المكان الذي يزدحم بالأغبياء
19-إيلا وصلتي لمحطة القطار بكري التران يتعطل..ويلا وصلتي معطل التران يجي بكري
20-إيلا طاحت من يدك شي حاجة صغييييرة..غتطيحوغتمشي لأصعب بلاصة مايمكنش توصل ليها
21-غير تعمر يدك بالصباغة ولا لاگريس تجيك الحكة ف نيفك
22-إيلا ديتي شي جهاز خاسر للمعلم يصاوبو..كيخدم قبل مايقيسو المعلم..
الواحد واخا هاد القانون يبقى ديما متفائل
منقول
ليست هناك تعليقات:
إرسال تعليق