نعم للاحتجاج في اطار الوحدة الوطنية دون تعصب عرقي

اولا تحية لخوتنا مغاربة الريف او امازيغ المغرب على حد سواء نحن معكم بالقلب والفكر في تحقيق المطالب العادلة والموحدة.
كانبغي نقولهم الواحد يطالب بحقو مشي عيب؛ لكن ميكونش متعصب لعرقه؛ خصو يكون كيهمو المصلحة العامة على حد سواء مايضرش فئة على حساب فئة وماينفعش فئة دون اخرى.
حنا كمغاربة بعيدا عن التعصب العرقي عايشين داخل حدود وحدة بحال شي اسرة عايشة فدار وحدة تحت سقف واحد، فكل اسرة كاينين افراد يلا شفتي شي فرد خطأ وريه الخطأ ديالو باش يصلح هذ الخطأ لان الكمال المطلق مكاينش حتى فشي انسان  شحال ما كان عندو من العلم او القوة او الجاه، وكذلك خص الفرد اللي خطأ ياخد هذك الملاحظة بعين الاعتبار ويراجع سلوكه والنقطة اللي انتقدتيها، ويحاول يصلح ما يمكن اصلاحه.
حنا مع الاخوان ديالنا فالريف والجنوب والشمال والغرب والشرق والوسط ايضا مغاربة كتوحدنا الجغرافية والهموم والمشاكل والآمال في غد افضل كيحتضن كل افراد الشعب بعيد على اي عنصرية عرقية او اقصاء او تهميش لاي فئة.
يلا ماعجباتكش شي حاجة في النظام ولا في السياسة المتبعة في البلاد يخرج ويحتج مايسكتش ويبين مكامن الخطأ باش تصلح.
والاول والاخير كانبقاو كلنا مغاربة.